POLISI YAPIGA MARUFUKU WANACHAMA WA CUF KUFANYA USAFI KATIKA MAKAO MAKUU YA CHAMA HICHO

POLISI Kanda Maalumu ya Dar es Salaam imezuia wanachama  wa Chama cha Wananchi (CUF) wakiongozwa na Mbunge wa Temeke, Abdallah Mtolea kufanya usafi katika ofisi za Makao Makuu ya Chama hichokutokana na kuwepo kwa viashiria vya uvunjifu wa amani.

Kamanda wa Kanda hiyo, Kamishna Simon Sirro amesema kutokana na sababu za kiusalama na mgogoro wa muda mrefu unaoendelea ndani ya chama hicho , ni vyema mbunge huyo na wanachama wengine wakafanya usafi katika maeneo yao wanayoishi au kufanyia kazi.

“Kwa kuwa wanaonesha wanapenda kufanya usafi, ningeomba wafanye usafi katika maeneo yao. Tunachokifanya ni kuzuia madhara makubwa yasitokee, hivyo mwana Dar es Salaam yeyote naomba usishiriki katika shughuli hii, kwakuwa kuna dalili makundi haya yakikutana kutakuwa na fujo,” amesema Kamishna Sirro.

Aidha, amesema jeshi hilo linawashikilia watu saba kutokana na vurugu zilizoibuka katika mkutano wa viongozi  wa CUF wilaya ya Kinondoni na wanahabari  ambapo watu mbalimbali walijeruhiwa wakiwemo waandishi wa habari.

Amesema upelelezi umekamilika na jalada limeshafikishwa kwa Mkurugenzi wa Mashitaka (DPP) kwa ajili ya kuandaa mashitaka na baadae kufikishwa mahakamani.

Amewataja waliokamatwa kuwa ni pamoja na Ofisa Mahusiano na Mawasiliano wa chama hicho, Abdul Kambaya, mlinzi wa karibu wa Mwenyekiti wa CUF, Profesa Ibrahim Lipumba,  Mtawa Rashid  na Khamis Abdallah maarufu kama Taekwondo.

Friday, April 28, 2017  Copyright: Dailynews Blog      Maoni: 0